وحشتينى
وأكتبلك أقولك إيه ؟!!
وحشتينى!
وهى الكلمة دى يامّا
هاتكفينى؟
يانبض القلب
ياكل الحب
يانور عينى
وحشتينى
وحشنى حضنك الدافى
ونظرة صدق فى عنيكى
ولما يامّا تضمينى
وتمشى بايدك على جبينى
أقولك أه يامّايا
وحشتينى
فى غربتى حاسه بقلبك
بيدعيلى
ونفسى تاخدينى لحضنك
تضمينى
بنظرة صدق فى عنيكى
تضمى الكون حواليكى
واقول اه يامّايا
وحشتينى
ومش قادرة اواصل تانى
أيامى
ولا قادرة أداوى فى بعدى
ألامى
بنادى عليك يامّايا
بنادى بكل إحساسى
بنادى وصوتى جوايا
ياكل الناس ياناسى
ياتاج محطوط على جبينى
يانبع حنان بيروينى
يانبض القلب
ياكل الحب
يانور عينى
وحشتينى
شعر آمال عبد الدايم المِسَتـــّى
من ديوانى ( ورجعت تانى ياوطن )
ديوان الثورة
