لمين غيرك أقدر أكتب
والقلم يقدر يبوح
لمين غيرك أقدر أشكي
والقلب مليان جروح
لمين غيرك أقول وأحكي
ياغالية
يا أغلى مــ الروح
دة انتي الحنان كله
على صدرك يامة ضميني
فــ حضنك الأمان كله
على حبك فتحت عيني
وفــ مدرستك إتعلمت
تنساني الدنيا وإنتي مــ تنسيني
فاكرة يامة لما قلتي
يـــ بني إسمع الكلام
كنتي خايفة عليا يامة
مـ الشوارع والزحام
يوم مــ يامة سيبت إيدك
يومها كان أول صدام
وإتلخبطت يومها حياتي
دي غلطة كانت من زمان
وانا إتعلمت منها
إزاي أدور عــ الامان
والفضل راجع يامة ليكي
خلتيني اكون انسان
سيبت إيدك وسافرت هناك
قلت أروح لبلاد بعيد
كنت فاكر إني هانجح
وابني لينا بيت جديد
أتاريني كنت باحفر
بــ ايدي حفرة بباب حديد
ورجعت لك تاني يامة
بعد مالآوان فات
سالتهم عنك قالوا راحت
قلت فين هو الرفات
اروح لها يمكن تسامح
وتزيح من حلقي الآهات
إتعلمت خلاص يا أمي
من يومها لحد الممات
اللي مايسمع كلامك
يحتمل كل اللي يجرى من سكات
