بسم الله الرحمن الرحيم و باسمه نبتدي
في البداية احب اشكر كل من شجعني على اني اكتب هالرواية
اللي ان شاالله تحوز على اعجابكم و رضاكم
و كل مايجري في القصة من وحي الخيال لا الشخصيات ولا القصة صجية
الا ان بعض الاحداث مريت فيها بحياتي سابقا
اول شي نعرفكم على الشخصيات في هذي الرواية ..
ملاحظة : ممكن تكون في لحظات رومنسية لكن اغلبها ضحك × ضحك
عايلة بو يعقوب
يعقوب : البجر عمره 20 يدرس بجامعة الكويت مينون و العايلة كلها مينونة احلا شي عنده ان يطفر اخته دلال ولا مايعرف يعيش.. اسمر و جسمه معتدل و عاد شوفو الحركات بشعره و لحيته
حنان : البنت الكبيرة عمرها 18 عاقل لكن عليها حركات ميانين احلا شي عندها بالدنيا المطبخ لان هوايتها من واهي صغيرة الطبخ .. عيونها كبار و رموشها كثاف شفايفها مليانه و خشمها شوي طويل
دلال : الجعدة عمرها 17 ماعندها ذرة عقل بمخها عنيدة و كل حركاتها خبلة و ماتخلي احد بحاله احلا شي عندها بالدنيا انها تضغط و تنضغط .. متينه بالنسبة لعمرها لكن مو وايد بنظر الناس .. عيونها صغار لكن رموشها كثيفة براطمها عادية و خشمها حلو
يوسف بو يعقوب : ريال خايف الله و ذاكره بكل خطوة يخطيها و الزم ماعليه عياله و حبه الوحيد اهي سعاد ام عياله .. يتضايق لضيق عيااله و يفرح لفرحهم .. على قد حاله غير ان محتاج لكن نفسه عزيزة مايمد ايده
سعاد ام يعقوب : مرة تحب تدلل ريلها و عيالها و امهر شي تسويه الحلويات و طبعا حنان ماخذه نفس طبع امها الطيب بالطبخ و اشغال المطبخ .. مسمية مصلية تخاف ربها و تذكره
عايلة بو محمد
ياسر بو محمد : عسر شوي و يحب يسوي روحه معصب على عايلته عشان يطفرهم .. مايحب يغصب احد من اهله على شي اهما مايبونه و حنوووووووووووووووون
مريم ام محمد : اصغر من بو محمد بمدة لكم عليها شوي .. انغصبت عليه من ابوها الله يرحمه على اساس انه ولد رفيجه لكنها حبت ياسر بعدها .. باااااردة و برودها يبط الجبد مرات عكس ام يعقوب مهارتها بالاكل الرئيسي يعني مجابيس وما الى ذلك .. طيبة و على نياتها و تسامح قبل مايتاسف الشخص لها
محمد : هم البجر كبر يعقوب و اهم مع بعض من عمر تقولون اخوان مو عيال عم الله يخليهم لبعض .. يدرس هم بجامعه الكويت لكن بتخصص غير عن يعقوب كله يتحرش بحنان عشان تبجي على قولته " دلوعه" بس دلال ماتخليه هههههه .. حنطاوي لكن شوي فاتح يحب القز و خصوصا شارع الخليج
محمود : اصغر من محمد بسنه عمره 19 مايواطن شي اسمه دلال ليش انها تعيب على خشمه الطويل و اهو من النوع اللي شوي خجول و مايحب يرد على احد حتى لو كان يتغشمر .. ستايله يحب يلبس دشاديش بدون الغترة و العقال و القحفية .. و يرفع جم الدشداشة شوي عشان يصير ثلاث ارباع
زنوب : اخر العنقود عمرها 9 سنين لسانها طويل ترد عاللي يسبها بعشر اسلوبها اسلوب عيايز ماجنها توها ماعدت الـ 10 طبعا و هل يخفى القمر عن مرافجة حورائوو
عايلة بو عبدالله
عيسى : بو عبدالله ريال عصبي و ادنات الدون يغثه كلمته اهي اللي تمشي بالبيت و له هيبة بين بناته يخافون حتى يتغشمرون وياااه شوي بخيل
نسيمة : ام عبدالله تحب تتكشخ و تلبس و تطلع و تزور و تروح و تيي .. متكبرة شوي و تحب تبين حق الحريم انها اهي الكل بالكل و دايما رافعه حواجبها على الناس
ساارة: البنت العووودة عمرها 23 متزوجه من ريلها جابر و عندها بنت وحدة اسمها فجر عمرها سنه
عبير : البنت الثانية بعد سارة عمرها 18 و تحب سوالف المراهقه " النت .. القز .. الخ "
فاطمة : عمرها 17 دلووووعة و ماتحب سوالف اللي مينن و جذي ولا تحب حركات اختها المراهقه عبير .. غرامها مطالعه المجلات و ازياء و موضه و مكياج .. الخ عشان جذي تقضي وقتها مع حنان علبونه نفس الميول
هدى : عمرها 13 تقضي ثلاث ارباع يومها عالنت و كله مالها خلق يعني نفيسة
نبدي باول بااارت
دلال قاعده بالصالة تطالع برنامج GHOST WISPRER و مندمجة حدها
يعقوب توه راد من محاضرة الساعه 12 دش الصاله بهدوء شاف ماكو احد راح الصالة ولا اخته عالتلفزيون و راح من وراها طقها بالمخدة على راسها ..
دلال : ويعااااااا انت يالكمخه ماتشوفني مندمجه حلايا شعرك؟
يعقوب : اوخ اوخ والله مادري عبالي الخدامه كنت بهاوشها ليش حارقه قميصي العزيز
دلال : شنهو شنهو شنهو الخدااامه هاا؟ اقوول محبوب روح ييبلي غدا
يعقوب : خير ان شاالله نطريني عند الدوار
دلال : والله خوش محبوب انت تتحجى كويتي عدل
يعقوب : انا اروح غرفتي وايد اهون يالمتيينه
توها دلال يايه بترد عليه ولا تشوفه يركض لغرفته
دلال بنفسها : والله اعلمك يالعصل هين هين
حنان : انتي شفيج تتحلطمين ماتعرفين تسدين حلجج شوي
دلال : شتبين شتبين شاللي حارق بصلة راسج؟
حنان : لا لا لا انتي معصبة اخليج احسن
دلال : يكون احسن والله بس ممكن شوي خشمج مغطي التلفزيون
حنان : لااااا؟ انزين خنشوف منو يكلمج
دلال ماردت عليها قعدت تطالع المسلسل توها بترفع الصوت ولا يخلص
جان تصرخ من قمت راسها : يعقوبوووووووووووو الله يلعن ابليسك و ياخذ فلوووسك و يسكت حسك يا ويه الفقرررررررررررررررررر
سعاد ام يعقوب : دلال و ثووول علامج ادعين على اخووج عيب عليج يلا بلا هذرة زااايدة و قومي جهزي السفرة حق الغدا الحين ايي ابوج !!
دلال : يمااا حنانوو موجودة خل تتعلم بالله شلون تبي تتزوج انا اقص ايدي من العرج اذا واحد بس واحد قرب صوب البيت ينحاااش اصلا
حنان طالعتها بنظرة من فوق لي تحت و راحت عنها و ام يعقوب ليلحينها تصرخ على دلووول لانها ليلحين ما قامت ..
زهبو السفرة و حطو الصواني و الاكل و على ييت العصير و الاكل دش بو يعقوب
بو يعقوب : السلاااام عليكم
ام يعقوب : و عليكم السلام هلا والله غسل ايدينك و تعال تغدا
بو يعقوب : ان شاالله من عيووووني
بو يعقوب غسل ايدينه و راح الصاله عشان ياكل ليش انهم عايشين بشقه ..
لقاهم كلهم من كبيرهم لي صغيرهم قاعدين عالسفرة
بو يعقوب : بسم الله مامداني احط ايدي عالفوطة الا انتو قعدتوا
دلال : يبا يواعه شنسوي الوالدة الله يهداها ميوعتنا مو مخليه علينا قاصر
يعقوب : والله انتي اذا ماتعرفين تتحجين لا تتحجين لانج تلوعين جبدي الصراحه
دلال : نعم نعم نعم ؟ بالله شقلت انا غلط الحمدلله ماقط بدليات نفس بعض الناااس
حنان : لاااا؟ بالله مع كرشج ماتقوليلي شلون ميوعتج امي و مو مخليه عليج قاصر؟
يعقوب : ههههههههههههه والله انج فلم يا دلوول ههههههههههههههههههههه
دلال تفشلت : اااا لا انا اصلا قلتها عمدا
يعقوب : لااا؟ انزين الحين انا .....
قاطعتهم ام يعقوب : بس عاد خلو طنازتكم بعد الغدا نبي ناكل و حسابج بعدين يا دلول
قعدو ياكلون بس طبعا القعده ماخلت من الحركات اللي بالويه من يعقوب و دلال ..
:::::::::
في بيت بو عبدالله
نسيمة " الام" تتحجى بالتلفون : اقوولج امس شارية ذاك الطقم اللي يطير عقلج
ام سارة رفيجتها : صج؟ الله يهنيج فيها يوخيتي و يخليلج بو عبدالله مو مخلي عليج قاصر
نسيمة : حبيبتي اصلا بو عبدالله بدوني مايسوى فلس حمر
ام سارة : حرام عليج يا مرة ترا اخرتها راح يروح من ايدج
نسيمة : اهو فيه خير بس عيونه تروح يمين لااخليييه يندم و يبجي (المراة الحديدية)
ام سارة : استغفري ربج يا مرة .. انا الحين بروح لان سارونة قاعدة تبجي
نسيمة : انزين مع السلامه
صكت التلفووون
فطوووم : يمااا ابي فلوووس
نسيمة : انا مالي شغل روحي حق ابوج اللي عندي بروح فيهم الصالون وراي عزيمة
فطوم : اوكي مامي
راحت فطوم عند عبير اختها بغرفتها
طق طق طق
عبير : اووووف منوو بعد؟
فطوم : انا حياتي
عبير : دشي و صكي الباب وراج
يت فاطمة و قعدت يم عبير
فطوم : عبور بروح الـ SHOPPING اليوم مع my friends تيين؟
عبير : صججج؟ < تبيها من الله .. ووين بنروووح؟
فطوم : مادري بس شكلنا بنروح الافنيوو الحب
عبير : اوخ اوخ اوخ الافنيو مرة وحدة يلا فوووقه
فطوم بفرح : يعني تييييين؟
عبير : أي أي بيي يلا وريني عرض جتافج طلعي خل انقيلي لبس
فطوم : زين زين انا بروح البس و احطلي ميك اب شوية لان الساعه 5 بنروح اوك؟
عبير : انزين خو ماقلنا شي يلا روووحي
فطوم : كاني رحت واي واي
:::::
بيت بو محمد
و تحديدا بغرفه محمد
محمد قاعد متملل يفكر يشتري البلاك بيري ولالا
دش عليه محمود بدون سابق انذار
محمد : ويعه حتين ويعه انت شنو ماتعرف الاختراع اللي اسمه طق الباب
محمود : ياخي اخوي و امون شفيك انت
محمد : لااا؟ دامك تموون عيل شحقا تسوي روحك مؤدب جدام البنات و الناس؟
محمود : ياخي انا جذي بس لما اشوف ويهك استغفر الله احس اني مسطول
محمد يطقه بالمخدة : ويهك يا معود حلايا الفلافل اللي براسك
محمود : يعني بتبلش ضغاااط؟ ترى اطلع
محمد : لا خلاص قول شعندك
محمود : ودي اقول حق ابوي نسافر او نروح شاليه او نتيمع بمكان او نروح البحر كيفه بس ابي اطلع مليت من البييييت
محمد : والله فكرة حتى انا متملل شوي و اشق هدومي بس اخاف امي تزفني هههههههههه
محمود : واي يمه لا يطيح نصك هههههههههه
محمود : يلا انا بروح اقوله تيي؟
محمد : يلا يبا نروح شورانا
::::::::
بعد الغدا ابيت بو يعقوب
العايلة كلها بالصاله يطالعون فلم اجنبي و الكل مندمج و محد يدري عن الثاني
الا ان دلال حست ان في شي ناقص ياربي شنو الناقص
وييييييييين يعقووووووب؟
تسحبت شوي شوي لين وصلت لغرفه يعقوب
دلال دشت مرة وحدة : بو يعقه شتسوي؟
يعقوب : ويعه الواحد ماعنده خصوصية معاج انتي و بعدين يالثولة اذا اسمي يعقوب شلون اسمي بو يعقه مع الويه .. احم احم انا اسمي بو يوسف
دلال : اولا مو الا الخصوصية شتبي تسوي يعني هااا اعترف ... ثانيا غلطة مطبعية ولا يهمك بو يسوف خخخخخ
يعقوب : مهما اعلم فيج هم تظلين بقرة ماتفهمين
دلال : ههههههههههههههههههههههههههههههههههههه شكرا شكرا شهادة اعتز فيها
يعقوب : مالت اهوو على حظج انتي ويا خدج والله بالليل كله عبالي خدج مخدتي
دلال : ويع ويع جم مرة تعيدها ترا حفظناها .. و بعدين احلا منك يالعصل جنك قلم رصاااص
يعقوب : هههههههههههه بل علييييج من وين اطلعين حجي انتي .. من خدج؟ هههههههههه
دلال : لا والله الا قوول من كرشك ماشاالله يخزن يخزن معلومات
يعقوب : كااااااااااك اقول عطيني خشمج المخنفر انام علييه
ام يعقوب : بسكم بسكم صراخكم وصل لي الصااااااله و يهد يهد حيل ابليس قومو سوولنا نفيش عشان نكمل الفلم
يعقوب : يما كاهي ميري جدامج هالكثر متينه اللي مانفرق بينها و بين الكبت؟
ام يعقوب : هههههههههههههههههههههههههههههههههههههههههههههههههه ههههه
دلال : يماااا شنهو هذا تضحكين بعد مايشوف روحه هذا جنه علاقه ملابس؟
ام يعقوب :ههههههههههههههههههههههههههههههههههههههههههههههههه ههههه
يعقوب و دلال طالعو بعض : يما شفيييج ؟
ام يعقوب : هههههه مافيني شي ههههههههه يلا قومو بلا حجي زايد و خرابيط
حنان طبت : شفيكم طقيتو بعض هالمرة؟
دلال بتحر حنان : لا اصلا انا اطق العالم ولا اطق اخوي حبيبي
يعقوب : ويييييييع
دلال : ياشقول خنكمل الفلم
حناان تسوي روحها زعلانه : يمااا شوفيهم ولا جني اختهم الكبيرة
يعقوب : روحي زين الكبيرة شنو مو تارس عينج ( و يوريهم ايدينه جنه فيهم عضلات )
دلال : ويع ويع نزل الجم لوعت جبدي بجلاحه ايدينك
ام يعقوب : بس عاد يلا سمعو الكلام و يلا قومو
دلال و يعقوب : ان شاالله
::::::
صارت الساعه 5 موعد طلعت عبير مع فطوم و رفيجاتها
عبير مخلصة من الساعه 4 و نص و اللي ماخرتها اهي فطوم
عبير : فطووم يلا لاعت جبدي و انا ناطرتج
فطوم : نطري خو ماخلصت من الميك اب يا ربي عليج
عبير : انزين شحقا هذا كله بتروحين عرس يعني؟
فطوم : شعليج انتي بصير حلوة
عبير : انزين خو حطي بالسيارة لوعتي جبدي
فطوم : كاني خلصت يوووه
رن تلفون فطوم و كانت رفيجتها روان اللي تعرفت عليها بالنت
روان : فطمو يلا وينج انزرعت انا براا
فطوم : شنو يعني ماعندج مكيف كاني نازلة خو و ترا اختي بتيي معانا
روان : انزين يبا حتى لو خدامتكم بس يلا
فطوم : اوكي كاني عند الباب
وراحوو الافنيوز
:::::
في بيت بو محمد
بو محمد يطالع الاخبار
محمد و محمود يتساسرون
محمد : يلا قوووله
محمود و ليش انت ماتتحجى مو انت الكبير؟
محمد : و ليش مو انت اللي اقترحت؟
محمود : أي انا فكرت و انت نفذ
محمد : انا اقول لو نقلب ويوهنا احسن
بو محمد : علامك يبوك تتساسر مع اخوك جذي؟
محمد : لا ولاشي يباا بس عندنا طلب و نتمنى ماتردنا
بو محمد : انتو تامرون ياعيالي لو تبون عيوني المركبة
محمود : تسلم عيونك يعلك ذخر ان شاالله بس ...
بو محمد : بس شنو؟
محمود : نبي نسافر او نطلع او نروح الشاليه او نتيمع مع عمامي بمكان أي شي بس المهم نطلع لان بصراحه يايبا ملينا من قعدة البيت
ابتسم بو محمد : صج لي قالو قلب الابو على عياله
محمد و محمود : هههههههه ليش يبا
بو محمد : كنت ناوي احجز لنا كلنا احنا و عمامكم نروح شاليه ثلاث ايام بس خفت انتو ماتبون ولاشي
محمد : صججججج يبا ؟ الله يخليك لنا ذخر ان شاالله و يطول بعمرك يا اغلى من غالي
محمود : والله اني احبك لويه الله فدييت راسك يبااا
بو محمد : لو ادري جان من زمان قاص عليكم
محمد : هههههههههههه لا يبا شدعوااا
محمود : الا صج يبا
بو محمد : سم ياولدي
محمود : سم الله عدوك .. من وين يايب مثل قلب الابو على مصروف العيال مادري شنو
محمد : ههههههههههههههههههههههههههههههه يعني قرقش المخابي يايبا
بو محمد : هههههههههههه مايغلى عليكم والله
يتلهم زنوب : وين بنروح يبا سمعنا طلعة
محمد : انتي شعليج ليش كله قاطه ويهج عند سوالف الرياييل؟
زنوب: انت مالك شغل دام ابوي راسه يشم الهوا انت مالك شغل ماتحاجيني اصلا
محمود : ول ول ول خلاص عمتي اسفين
زنوب : و انت بعد مو عبالك ساكته يعني انت لا .. اصلا انت اولهم لازم تحترمني
محمد : هذي اللي بقوم اطقها
زنوب : اتحداك تجيس شعره من راسي
محمود : زنبووو سكتي عنا لا ننحرج
بو محمد : بس عاد يلا .. زنوب حبيبت ابوها محد يحاجيها
زينب تطلع لهم لسانها
و محمد و محمود ياشرون لها بايدهم يعني اوريج هين
بو محمد : زينب حبيبتي بنروح الشاليه مع عيال عمامج يعني تصير يمعه
زنوب: اللللللله ونااااسة بنروح مع حنان و دلال
محمود عفس ويهه : مادري شتحبين بهالدلال انتي
محمد : ولا ادري شاللي ينحب بحنااان
زنوب : اولا مو شغلكم ثانيا دلال اموت عليها لان كله نتهاوش و حنان تحبني.
::::
بيت بو يعقوب
يعقوب طالع مع محمد رايحين عالبحر
حنااان تقلب بهالمجلات
دلال تتحرش بامها و امها كل شوي زافتها
بو يعقوب قاعد بالصاله يقرا جريدة
رن التلفون
بو يعقوب : الووو
بو محمد : بو يعقوب شلونك
بو يعقوب : هلا هلا هلا وغلا باخووي الغالي شلونك شخبااارك
بو محمد : الحمدلله بخير و انت يالغالي؟
بو يعقوب : دامك بخير لا تسالني بخير طبعا
بو محمد : الله يخليك ياخوي .. يابويعقوب انا عندي طلب و اتمنى ماتردني
بو يعقوب : عيوني لك ماتغلى عليك
بو محمد : تسلملي عيونك انا و العيال اتفقنا نروح الشاليه ثلاث ايام فقلنا نقولك و بنقول حق عيسى بو عبدالله عشان تصير يمعه
بو يعقوب : و انت الصاج ملينا من جو البيت و الشغل انا عني موافق خلاص اقول حق الاهل و ان شاالله نشوفكم بالشاليه
بو محمد : حبيب والله يلا انا اخليك فمان الله
بو يعقوب : فمان الكريم
راح بو يعقوب يقول حق مرته و بناته عن الطلعه و فرحو طبعا خنقولكم شسوو
دلال : ناقزت ناقزت ناقزت ليما تزلحقت على ارض المطبخ و طاحت على ظهرها و اهي تضحك جنها مينونة
حنان : من الوناسة باست ابوها و امها و لما طاحت دلال انسدحت عالارض تضحك و يرافسون بعض
ام يعقوب : حشاا حصن مو بنات
بو يعقوب : خليهم يبا يستانسون ولا دلال من شنو ينت؟من قعدت البيت
ام يعقوب : ههههههههههههههههههههه الله يغربل ابليسك يايوسف
حنان : ويك ويك ويك يالمينونة الظاهر امي ناسية تقطج بمستشفى الميانين
دلال : مينونة و افتخر انتي شتبين .. والله امي نست تقطج مستشفى الطب النفسي لانج مرات تخورينها
حنان : اوريج يالدبة
دلال : شنو بتسوين انتي اصلا تخافين مني
حنان قامت و مسكت ملاس و تطق دلول فيه
و دلال قامت مسكت البف باف و تلحق حنان فيه
و طبعا السالفه ماخلت من زف ام و ابو يعقوب
:::::
بالسوووق
فطوم و روان يدشون من محل و يطلعون من الثاني ماخلوو محل مادشووه
و عبير طبعا مو معاهم قاعده تخوزز بهذا و بهذاك
و اهم قاعدين يمشوون بيروحون المطاعم فووق
عبير سرحت بالغلط ولا تسرح بويه واحد
و اهو لاحظ
و اهم يمشون جان يروح يمها و يصفق
الصبي : لا تسرحين وايد بابا
عبير :يبوووووي امبي فشلة .. كله منج روون
روان : الحمدلله و الشكر come on يلا فوق .. أي والله و تقطها براسي
راحو فوق قاعدين ياكلون
فطوم تحاجي روان : رووون امبي شوفي هذاك قاعد يطالعني no way
روان : انتي شوفي اللي يمه واي امبي فديتهم
عبير : والله انتو ماعندكم سالفه شوفو هذاك اللي هناك .. و تاشر علييه
و ابتسمت له
الصبي ماصدق خبر قام و راح صوبهم
و قعد بالطاولة اللي يمهم بالضبط
الصبي : يا حلات القمر لي نزل عالارض
عبير نزلت راسها مستحية
روان بنعومة : لو سمحت ممكن تروح؟
فطوم : اهم شي انتي وياها قلنا نحش بس ماتحاجونه جذي مايون الا بالعين الحمرا هذول ( ان شاالله مو اشكرة يا فطوم خخخخخخ)
الصبي : و الغزال ليش معصبة ماطلبنا شي غير الرقم
فطوم :هاك الرقم 777
الصبي : ههههههههه مو انتي ابي هالقمر ( و ياشر على عبير )
و عبير ساكته مستحية ماترد
روان : فطوم شفيج عالصبي ماقال شي كلهم جذي خو
فطوم عصبت : لا والله؟ و هذا انا اصغر منها و اعلمها
و قامت فطوم معصبة
لحقوها روان و عبير يركضون
:::::
هدى قاعده تحوس بالبيت ماتدري عن هوا داره بما انها عالنت 24 ساعه
هدى تحاجي نفسها : الحمدلله و الشكر شنو محد ينثبر بهالبيت؟
هدى : امبي شفيني ينيت احاجي نفسي؟خل اروح المطبخ ابلعلي جمن شي بعدين اروح عالنت
راحت هدوو سوتلها توست و جبن و اهي شايلة الصينية
تبي تصعد دارها
الا دخلت عبير و فاطمة اللي كانت مفولة
على طول فاطمة صعدت دارها حتى ماسلمت
هدى : شفيها هذي؟
عبير : و انتي ماشاالله من متى تطلعين من غرفتج تصدقين نسيت شكلج ؟
هدى : هاهاها مليقه .. شفيها فطوم شسويتيلها بعد؟
عبير : ماسويت شي والله
هدى : والله انتو ميانين وانا مينونة اقعد معاكم
راحت هدى دارها و قعدت عبير تقول شسوي ماشسوي
في اليوم الثاني سارة دقت على امها نسيمة
و دار الحديث كالتالي
سارة : الوو
نسيمة : هلا سارة شلونج
سارة : تمام يما و انتي
نسيمة : الحمدلله .. طافتج امس عزيمة ام عبدالعزيز
و قعدت امها تحش
و سااارة تسمع و تجامل .. بعد امها ماتقدر تجعمها
بنص الحجي
دش بو عبدالله البيت و اشر حق نسيمة انها تسد التلفون
نسيمة : ساارة احاجيج بعدين و اكملج الحجي ابوج مادري شيبي
سااارة : خلاص اوكي يما سلمي عليه
نسيمة : انزين يلا باااي
بو عبدالله : منو تحاجين انتي بهالساعه من الظهر؟
نسيمة : شعليك انت و بعدين حرام احاجي سوييرة؟ أي والله ! و بعدين شعندك قاعد تخوزز فيني من مساع؟
بو عبدالله : يام عبدالله اخوي بو محمد حاجز شاليه حق يوم الخميس هذا و قالي نروح معاهم ها شرايج؟
نسيمة : اممممم حريمهم بيون؟
بو عبدالله : ايي عيل بروحهم؟
نسيمة : ويييييع ماني رايحه
بو عبدالله : كيفج بس انا و البنات بنروح
نسيمة : ااا لأ خلاص بيي
بو عبدالله : على راحتج
راح بو عبدالله وقف عند الدري ينادي بنات
عبييييييييييير فطووووووووووووووم هدوووووووووووووو
عبير : هلا يبااا
فطووم و مبين عليها العصبية شوية : خييير يبااا شصااير؟
هدى و اهي تبي تخلص بسرعه عشان ترد عالنت : هلا يبا شنو شفيك؟
بو عبدالله : يعني بقعد احاجيكم عند الدري تعالو نزلوو
عبير : يلا فطوم
فاطمة طالعت عبير من فوق لي تحت و نزلت
عبير : اففففففففف
هدى : انتو ترا ماعندكم سالفه
عبير : انا اقول لما تسكتين وايد تصيرين احلى
هدى : امشي بس امشي
يو البنات و قعدو جدام ابووهم
بو عبدالله : حياالله العراااايس
البنات : الله يحييك يباا
بو عبدالله : يا بناتي هالخميس اخوي بو محمد حجز شاليه ثلاث ايام و عزم بو يعقوب اخوي و عزمنا يعني بتصير يمعه العمام كلهم .. ها شرايكم تبون تروحون ولا لا؟
البنات كلهم بدون تردد : اكيييييييييييييييييييد
بو عبدالله : خلاص جهزو لان ترا بنروح هالخميس مو الاسبوع اليااي
البنات : ان شااالله
بو عبدالله بقلبه : الله يخليكم لي ولايحرمني منكم
:::::::
دلال من امس و اهي تناقز من الوناسة و يعقوب يوم درى خو سوا اللي العن من دلال جنهم مو شايفين خير طلعات هههههه
الساعه 3 الفير قامت دلال حست انها تبي ماي
فقامت راحت المطبخ .. شربت ماي
و اهي رادة .. سمعت صوت من غرفة حنان و هذا اللي سمعته
حنان : والله لو بايدي جان كلمتهم والله ماقدر .. ليش مو راضي تصدقني .. حرام عليك يا جاسم والله اني احبك .. لا مو جذي .. انطر عليي حبي انطر
دشت عليها دلال و اهي مبطلة عيونها مو مصدقه
حنان سدت التلفون على طووول و اهي خايفه
دلال : انتي يا حنان؟
حنان : دلال تكفين وطي صوتج لا تسمعج امي قعدي خل افهمج
دلال : شفهم يا حنان قوليلي شفهم؟
حنان : هذا انا تعرفت عليه بالنت و كان مجرد اخو والله العظيم بس مادري شلون حبيته يقولون الحب محد يقدر يسيطر عليه والله لو بايدي جان ماحبيت بس والله مو بايدي تكفين حورو تكفين فهميني
دلال : حنان لايكون على بالج اني بفتن .. لا والله لا بالعكس انا بساعدج .. الحين قوليلي السالفه من الاول
حنان : مثل ماقتلج حبيته و يبي يتزوجني بس انا مادري ليش اخاف اقول حق امي و حاسة اني غلطت
دلال : دام جذي يعني انتي ماتحبينه من قلب
حنان : تعتقدين اعجاب؟
دلال : مو بس اعتقد الا متاكدة
حنان : انزين شسوي الحين اخاف اقوله مابيك يفضحني
دلال : شوفي انتي لما يدق قوليلي و انا احاجيه
حنان : شتبين تسوين؟
دلال : ياشين اللقافه خخخخخ خلاص خو قتلج انا احاجيه
حنان : ههههههههه اووكي تم
:::::
يااا اليوم المطلوب حبيب الكـــل " يوم الخمـــــيس"
و طبعا محمد و محمود و ابوهم و امهم و زنوب من الصبح رايحين الشاليه من الوناااسة
بعدها يوو بو عبدالله و ام عبدالله و بناتهم كانت جريب الساعه 12 الظهر
و بعد الصلاة يوو بو يعقوب و ام يعقوب و عيالهم
محمد : يعقووو طافك شكل البحر الصبح والله عجييييب
يعقوب : يبا انت فاااضي تطالع البحر الناس الصبح ينامون مو يطالعون البحر
محمد : انت ترا كلش مو رومنسي مادري شلون بتتزوج
محمود : اصلا اقص رقبتي بعد مو ايدي اذا وحدة قبلت فيه
دلال : انت بو خشيم مالك شغل باخوي الكل يتمنااه اصلا
محمود عفس ويهه : ولييييه ... قطيعة ملقوفة ملقوفة
يعقوب : حلاتها اختي لي مدحتني
دلال تساسره : لا تصدق نفسك وايد ترا انا كارهه نفسي ليش قلت جذي
يعقوب : هههههههههههههههههههههههههههههههههه
محمد : وين اختج الدلوعه دلووول
دلال : ما شاالله دلوول بعد؟خخخخخ اقول حموودوو اختي الله يسلمك قاعده تقرا مجلة
محمد : ناديها خنخليها تبجي هههههههه
دلال : أي انت تخليها تبجي و انا اخليك تبجي ههههههه
يعقوب : كاااااااك بو جويس ماتوقعت بنية تغلبك هههههههههه
محمد : وين اشر لي على اللي يغلبني بس
دلال : بدون ماياشر انــــــــــــــا
محمد : اول مرة اشوف بط يتحجى
دلال : والله انت ويا ويهك جنه طوفه على هالبياض
محمد : حلاااااتني ابيض و الكل يبيني
دلال : خير ان شاالله الا الكل يقط عليك طماط و يمشي وطماطة خايسة بعد
محمد : حاصلج عاد
دلال : هههههه محمووودوو شفيك منجعم اخاف تخاف مني خخخخخخ
محمود : ماحاجي يهالوو
دلال : يهالوو طل بعينك توني بعز شبابي احسن منك يالشيبة الصبغ لاعت جبده منك من كثر ماتصبغ هالراس المعفن
يعقوب : كاااااااااااااااااااااااك لا لا عيال عمي ياااسر ولاشي جدام دلوول محد يعرفلها غيري هههههه
دلال : أي خير ان شاالله شكلك لما اضغطك بالبيت تبوق قطاتي و تقول حق ربعك انا امصخرها اعرف هالسوالف حبيبي ماره عليي
محمد و محمود : هههههههههههههههههههههههههههههههههههههههههههههههههه هههههههههههههههههههههههههههههه عيل تعيب علينا هاا
يعقوب : مالكم شغل فيها جذابة
يت حنان : يعقوو منهي الجذاابة هااا؟
محمد : اقول حنان ترا مكياجج بيسيح
دلال : ساااحت عيوووووونك و انت مبققها قول امييين
محمود : ككككككككككككككككككككككك
محمد : انتي شتبين؟ و انت يالدثوي بدال ماتضحك دافع عني
دلال : كيفي بنت ابوي و ياية شاليه شحارك انت
محمود : والله شسويلك اذا انت منت عارف ترد
محمد : خياااااااااااااااانه يالاخووووو
يعقوب : لااا عاد كل شي ولا بو جويس حبيب قلبي
دلال : أي انزين اللي يسمع خفت الحين خخخخخخ
و سوو فريقين فريق حنان و دلال و فريق محمد و يعقوب
و محمود ممتنع ههههههه
و بدوو ضغااااط
بالمطبخ
ام محمد : حبيبتي ام يعقوب ماعليج امر عطيني السلطة
ام يعقوب : ان شاالله .. وييه ما شاالله علييج ام محمد عيني عليج باردة ريحت الطباخ تفطر الصايم
ام محمد : ههههههه شدعواا ام يعقوب كل شي لكم يصير حلوو
ام يعقوب : وي فدييييتج و فديييت الطباااااخ اللي من عندج ايي و عشانج هالكيكة حلفت عليج تذوقينها اول وحدة
ام محمد : ههههههه لا والله حشا بدون ما اذوق دامه من ايدج عسل حبيبتي
ام يعقوب : حلاتج والله يامريووم وياحلات كلامج .. مو بعض الناس
ام محمد : ويييه خليها عنج يام يعقوب لا تاخذين ذنب
ام يعقوب : والله مابي اتحجى عنها بس شوفي شلون مخليتنا بروحنا بالمطبخ و اهي تسولف بالتلفون بالصاله؟
نسيمة دشت عليهم و تخصرت : حبيبتي سعادو اذا عندج شي تعالي قوليه بويهي اوكي؟
ام يعقوب : شوفي يام عبدالله انا بسكت عنج لكن ان تعديتي حدودج لا تلوميني
ام محمد : يا جماعه صلو عالنبي مايستاهل اللي تقولونه هذا
ام يعقوب : اللهم صلي و سلم عليه
نسيمة : الحمدلله و الشكر ناس اللهم يا كافي
و راحت عنهم
ام يعقوب : سمعتيها اللي ماتخاف ربها
ام محمد : سمعتها ياسعاد بس مسحيها بويهي ماتسوى عليج حبيبتي انتي
ام يعقوب تنهدت : الله يسامحها بعد الواحد شيقول
و في طرف الرياييل
بو عبدالله : انا الحمدلله اموري ماشية عدل بالشركة و الحمدلله الخير وايد
بو محمد : الحمدلله مو مقصر على عيالي و مرتي الله يخليهم لي
بو يعقوب ماتحجى بهالموضوع لان مديون وماعنده من الخير ماعند اخوانه
بو محمد : ها بو يعقوب عسى ماشر شفيك ساكت؟
بو يعقوب : سلامتك ياخوي الا ماشفتو البورصة امس شاابة
بو عبدالله : أي والله الحمدلله الاسهم مرتفعه و شكلي ببيع
بو محمد : ويييه بيع بسرعه قبل مايصير احمر تراك جذي خسران
بو عبدالله : أي أي انا بعد فكرت جذي
و كملو سوالف
و بنات بو عبدالله
عبير : لازقه بدلال لانها تبي تلفت انتباه يعقوب
فطوم : قاعدة مع حنان يشوفون مجلات توها نازلة
هدى : قاعده عاللاب توب و شابكة من الوايرلس
تكلم رفيجتها نورة عالمسن
حـبـيـبـي اكــرهــك " نورة " : هدوو شقاعده تسوين؟
لـيـش الدنـيـا ظـالـمـة "هدى" : ماكو اتطمش
حبيبي اكرهك : انزين انا اشتركت بمنتدى ابيج تشتركين فيه معاي
ليش الدنيا ظالمة : منتدى شنهو؟
حبيبي اكرهك : منتدى *******
ليش الدنيا ظالمه : يلا فوووقه
نسيمة قاعده بروحها بالصاله بعد ماصار مع ام يعقوب : والله لاوريج ياسعادوو ان ماخليتج تندمين الساعه اللي رفعتي فيها صوتج عليي
صوب البنات و الشباب
دلال : عبور و ثول ليش لازقه فيني جذي اخاف انا امج وانا مادري
عبير بدلع جدام يعقوب : حبيبتي احبج شسوي
يعقوب يساسر محمد : وييييييع شنو مابلعها
محمد : ههههههههههه اللي يسمع اهي تموت عليك
دلال : يعقوو قول حق هالسمجه الخايسة توخر عني
عبير : افا الحين انا سمجه خايسة؟
دلال : اووووووووووف يعقوو حاجها
يعقوب : و انا شكوو فيج بنات و تنيازون
دلال : و هذا و انا ادافع عنك جدام هالدثوي اللي يمك
محمد بغشمرة : هي هي انتي ترا احوكج كف ترا
دلال : اوف اوف اوف والله قوية
محمد : يعقوبوو شوف اختك ترا والله ايدي تحكني
يعقوب : انا مالي شغل فيكم
محمود : ولا انا لاتدخلوني
عبير : صح كلام يعقوب لازم تحترمون بعض
محمد : انزين يلا يعقوب امش خنتمشى عالبحر
يعقوب : يلا مشتهي ايمع صدف
محمود : هههههههههه يا انت يلا امش
عبير : أي والله البحر اينن بهالوقت بروح معاكم
يعقوب : اااااااااخ بطني شب عليي مرة وحدة
عبير : سلامتك سلامتك شفيك؟ خلاص شباب انتو روحو و انا اقعد معاه
يعقوب و محمد و محمود و دلال فجوو عيونهم من جرأتها
دلال : عبير مو جنه امج تناديج؟
عبير : لا انا بشوف يعقوب يمكن يحتاج شي
يعقوب : لا الحمدلله صرت زين .. يلا بو جسوم مشينا؟
محمد : يلا
عبير : يلا
دلال : وين وين على الله؟
عبير : معاهم خو البحر اينن
دلال : شباب و بيتمشون احنا شكو .. اهو قعدي مكانج خنلعب اونو
عبير : شنو اونو يهال احنا؟
يعقوب : عبير كلام دلول صح و بعدين انا عندي موضوع خاص مع حمود و محمود
عبير انحرجت : اها اوكي
طلعو الشباب من الشاليه قاعدين يتمشون
::::
حنان : اوف اوف اوف فطوم لا يطوفج هالنفنوف
فطوم : اشوف وريني .. الللللللللللللله حنوون لازم تاخذينه
حنان : وين اخذه الله يهديج من وين لي ياحسرة بس الحمدلله
فطوم توها ياية بترد عليهم الا ام محمد و ام يعقوب منادين البنات عشان يجهزون الغدا
حطو الصواني و القفاش و الشوك
و قالو بسم الله بياكلون
الا ساارة و ريلها جابر مع بنتهم فجر داشين
سارة و جابر : السلام عليكم
الكل : وعليكم السلام
سارة : هاو هاو هاو بديتوو؟
ام يعقوب : أي أي بدينا يمه سحبيلج كرسي و قعدي لا سلام على الطعام
سارة : هههه ان شاالله يلا يمه فجر
:::::
خلصو الغدا و قعدو بالقعدة اللي براا
قاعدين يتحجون جان تقاطعم بتول بنص الحجي
سارة : لو سمحتو عمامي و خالاتي و بناتهم و عيالهم الاعزاء
دلال تساسر يعقوب : مادري عضوة مجلس امة
يعقوب : خخخخخخخخخ الا قولي عضوة في جمعية " كيف تكسر خشم النسور "
دلال : شكو مافهمت
يعقوب يرقع : انطمي شوي خنسمع
ام يعقوب : هلا يمه سارة
سارة : انا و جابر عندنا لكم خبر
الكل: خير اللهم اجعله خير؟
سارة : ان شااالله جابر يزهب المصاريف حق بعد 9 شهور
الكل : مصاريف شنهوو بعد؟
سارة تطالعهم : شفيكم مافهمتو؟ ( و تاشر على بطنها )
ام عبدالله و ام يعقوب و ام محمد قامو ايببون
كلللللللللللللللللللللللللللللللللللللوش
و قعدو يباركون لها و يدعون لها و للياهل
:::
صار المساااا
فطوم كانت بالدار اللي فوق تمشط شعرها و تربطه
عبير لقت الفرصه انها تتسامح من اختها و كان بالوقت المناسب
انطق الباب
فطوم : ادخل
عبير : فطوم ممكن اكلمج؟
فطوم : حياج الدار مو داري ولا يحقلي اني اطردج
عبير : يعني لو دارج بتطرديني؟
فاطمة : عبير شبغيتي؟
عبير : فطوم ليش تحاجيني جذي؟
فطوم : والله مادري نسيت شصار بالافنيوز
عبير : فطوم سامحيني تكفا فطوم والله مو قصدي غلطة والله ما اكررها صدقيني اني ابتسمت غصبن عني و اشرت بدون ما ادري .. و يوم يا عندنا انربط لساني ماعرف اتحجى دام صبي جدامي ماعرف ارادد ولا اعرف اجعمه مثل مانتي سويتي
فاطمة : شلون باالله مو قصدج ماتقوليلي؟ و شلون ابتسمتي و اشرتي بدون ماتدرين ها؟يعني يا عبير بتقنعيني ان في احط كان يطقج على ايدج و يقولج سوي جذي مثلا؟ انا اللي اصغر منج والله استحي اسوي هالاشياء و هذا المفروض انج انتي تكونين قدوة لي و انتي اللي تعلميني مو انا اللي اعلمج لو انا بدالج و سويت اللي سويتيه جان عطيتي طراق لاكنج اكبر مني و ماقدر اطقج احتراما لج بس مادري شلون تبيني احترمج دامج ماتحترمين شرفج و كرامتج و صورتج جدام الناس مو غريبة باجر لي يه احد قالج بشوفج رحتيله و انتي شاقه الحلج و مو بعيدة بعد لو يه احد يخطبج يقول لا مابيها هذي كذا و كذا الحين الناس اللي شافوج شبيقولون؟
عبير تبجي : فطوم خلاص حرام عليج والله ما اعيدها صدقيني هذا درس و تعلمته تكفين
فاطمة : خلاص عبير انا بسامحج لكن لايوصل لمسامعي انج عدتيها بيني و بينج ابوي والله العظيم الله بسمااه اني مو اهددج ولا اذلج لكني خايفه عليج و على صورتج جدام الاوادم و ابي مصلحتج
عبير : فديتج يا احلا اخت بالدنيا و هذا راسج و بسناه اموااااااااااااه
::::
و بعد يومين جميلين حلوين بالشاليه و استانس الكل فيه رد الكل لبيته
::::
في بيت بو محمد
محمد : يماااا
ام محمد : هلا يمااا
محمد : يما بغيتج بموضوع
ام محمد : قول يما امرني
محمد : مايامر عليج عدو .. امممم
ام محمد : قوول شفيييك؟
محمد : مافيني شي سلامتج بس .. امم .. انا ناوي اكمل نص ديني
ام محمد بفرحه مو سايعتها : صجججججججج؟ كلللللللللللللللللللللللللللللوش
ام محمد : منهي سعيدة الحظ يما؟
محمد : حنان بنت عمي يعقوب
ام محمد : يازين ماخترت يايما .. بس انت توك صغير يايما تدرس و ماعندك مدخل ثابت
محمد : أي يما انا اخطبها عساس لا تطير مني و بعدين احصلي وظيفه يعني هم ادرس و اهم اشتغل
ام محمد : على بركة الله .. بس لازم نشاور ابوك يما
محمد : أي اكيد
::::
مـــــــرت سنـــه ماصار فيها أي حدث يذكر غير ان سارة ولدت و يابت ولد سمته عيسى على ابوها و حنان وافقت على محمد بعد ماستغربت لانها ظنت ان محمد مايبلعها .. و ليلحين ماتزوجو عالما محمد يلقاله شغل
:::::
دلال بهالوقت صار عمرها 18
و يعقوب :21
و حنان : 19
محمد : 21
محمود : 20
عبير : 20
فطوم : 18
زنوب : 10
بس بعد خلصو الاوادم
المهم
:::
في يوم من الايام دلال كانت معزومة عند وحدة من رفيجاتها بمناسبة التخرج من الثنوية
و طبعا الحفلة ماخلت من الكييك و الحلوو
فتقدرون تقولون زادت من الحلو وايد
سارة رفيجتها : دلوول ويعه يالبالووعه بسج لا تنفجرين
دلال : واي واي شعليج انتي انا اللي بنفجر ولا انتي
سارة : كييفج بس لا تقولين مانبهتج
و راحت
عالحلو دلال تصير مطفوقة جنها بنت فقر خخخخخخ
يتلها ايمان رفيجتها الثانية روح بالروح : ككككككككككك دلوول يالبطة بسج شهالرجيم العجييب
دلال : اموون ترى مو فاضيتلج يوعانه
ايمان : يا بنية خلاااص بسج ماخليتي حق المعازيم شي غير الصمون الفرنسي !! خخخخخخ
دلال : هههههههه محد قالهم عزموني < صج مو كفو خخخخ
ايمان : دلوول قومي ترى والله مو زيين لا تشهيني انتي الثانية
دلال : تدرين ترى ذبحتوني كل ساعه وحدة ياية تقط عليي حجي خخ
ايمان : انزين نسيت اقولج .. حمد دق عليي و ناطرنا برا عشان نوصلج البيت
دلال : ترى اخوج هذا مليق خخخخخ اتغشمر بس تو الناس
ايمان : شوفي عااد مارضى على اخوووي انتي بالطقاق بس اخوي لأ خخخ
دلال : مينونة انتي مينونة؟ يلا امشي
ردت البيت
ام يعقوب : هلا يمه دلال شلون كانت الحفلة
دلال : ............
ام يعقوب : هاو دلال احاجيج شفيج ماتردين عليي؟
دلال : يما لحقي علي مو قادرة ااااااخ
و طاحت دلال على امها
و بصراخ ام يعقوب طلعو يعقوب و بو يعقوب و على طول لي المستشفى وحنان كانت عند رفجتها
بو يعقوب : ياالله سترك يارب احفظها يا رب
ام يعقوب تبجي : ياويلي على بنيتي الغااالية ياويييييليييييي
يعقوب واقف يهدي فيهم ليما يا الدكتور
الدكتور : منو ابوها؟
بو يعقوب : هلا دكتور بشر دلال فيها شي؟
ام يعقوب : تكفا يا دكتور بنيتي شفيها؟
الدكتور : مافيها الا كل خير ياخالتي بس سوينالها تحاليل طلع فيها ........
شفيها دلال؟
و شنو راح يكون موقفها من المرض؟
انطر توقعاتكم مع بارت يديد ^_^
مع تحياتي ..
مواضيع قد تهمك:
- روحي فداك
- لاتخليني
رابط إعلاني
اللي يدور وظائف- سكن – سيارات جديده ومستعمله- موبايلات- ارقام مميزه – مقتنيات...... كل شيء في بيزات
[ندعوك للتسجيل في المنتدى أو التعريف بنفسك لمعاينة هذا الرابط] #2
07-23-2011, 12:26 AM
عاشقته من قلبي
حلوه[size="6"[/size]
مواضيع قد تهمك:
- قطار الموت
#3
07-23-2011, 03:03 PM
عاشقته بس فاقدته
حلوه بليز كمليها بسرعه
مواضيع قد تهمك:
- مجنون ساره
- خواطر منقوله
#4
07-23-2011, 04:40 PM
عاشقه عبدالسلام
تسلموون على الردووود
مواضيع قد تهمك:
- روحي فداك
- لاتخليني
#5
07-23-2011, 08:46 PM
عاشقه عبدالسلام
الدكتور : مافيها الا كل خير ياخالتي بس سوينالها تحاليل طلع فيها .... السكر
ام يعقوب : السكر؟@@ ياااااااااااااويلي عليييج يا دلال
بو يعقوب : لا حول ولا قوة الا بالله هذي توها ياهل ماعدت الـ 20
يعقوب منصدم شلووون اخته فيها السكر و اهم مايدرون؟
الدكتور : الظاهر اهي مخربطة بالاكل لان السكر وايد وايد عالي عندها .. في احد بالعايلة فيه سكر؟
بو يعقوب : انا وابوي الله يرحمه
الدكتور : ايي ممكن يكون وراثه بالعايلة بس المهم الحين ابيكم تخلونها تحافظ على اكلها و ممكن احد اييني باجر اوصي اخصائي التغذية حق اكلها لان اذا السكر ظل عالي ممكن يكون له مضاعفات خصوصا بحالتها
بو يعقوب : لا حول الله استغفر الله و اتوب اليه
يعقوب : انزين دكتور نقدر نشوفها الحين؟
الدكتور : أي نعم تقدر اهي صحت قبل 10 دقايق و قلنالها انها مصابة بالمرض .. بس يا بو دلال تحتاج تقعد بالمستشفى جمن يوم عشان نضبط السكر
بو يعقوب : لا حووول .. خلاص امرنا لله .. مشكور يا دكتور ماقصرت
الدكتور : العفو ياعمي ماسوينا الا الواجب
بو يعقوب : يبا يعقوب روح حق اختك انا و امك بنروح نييب جم لبس حق اختك
ام يعقوب : لا يا بو يعقوب خل يعقوب يروح معاك انا بقعد مع بنيتي
بو يعقوب : امشي يا مرة ماكو حرمة بالبيت غيرج
يعقوب : عدل كلام ابوي يمه روحي
ام يعقوب بعناد : لا يعني لا
بو يعقوب بحدة : سعاد امشي معاي
ام يعقوب بقلة حيلة : ان شاالله .
::::
صار على هالحجي اسبوعين و دلال طلعت فيه من المستشفى و تعصب لما مايخلونها تاكل معشوقها الاول " الككــــــاو "
::::
ام يعقوب قررت تسوي حفلة بمناسبة خروج دلال فقامت عزمت الاهل
ام يعقوب : هااا يام محمد شقلتي؟
ام محمد : ايي يوخيتي من زمان مو شايفينج ولهانين عليج على قولتهم
ام يعقوب : هههههه فديتج مريوم بس مادري شلون بقول حق نسموو
ام محمد : قوليلها عادي ياسعاد مو الا تسوون مشاكل
ام يعقوب : ان شاالله بس انتي تعرفيني ماعرف اسكت .. يلا مو تتاخرون باجر تماام؟
ام محمد : اي حبيبتي قبل ماتقومين تلاقينا عند الباب
ام يعقوب : ههههههه حيااج الله
سكرت ام يعقوب من ام محمد و قعدت تقول شلون تكلم نسيمة بدون مايتهاوشون كالعاده؟
و ناااادت دلال
دلال : يماااا شفييج تصاارخين مابقالي غير اذني ابيها ترى ههههه
ام يعقوب : ويعه كليتيني بقشوري انا بس قلت دلال
حنان : يماا شفيج تصارخين لا تقولين اسم هذي ( تاشر على دلال ) بعدين ييني مغص ههههههه
دلال : هاهاها تصدقين توني اكتشف ان دمج خفيف
بو يعقوب : علامكم انتو ابي مرة اشوفكم تبوسون بعض
دلال : وييييييييع
حنان : انا ويع هاا .. اصلا انتي مايعجبج شي
دلال : اي انا مايعجبني شي
بو يعقوب عصب : بس عاااد انتي وياها و كل وحدة دارها ولا ترى ماكلم ولا وحدة فيكم و خنشوف شلون تطلعون و تروحون مرة ثانية تقعدون بالبيت تخمون و تنظفون
دلال : هييييييييييييييئ يبوووي لا لا حنوون حبيبتي انتي تعالي تعالي ( تبوس راسها )
حنان : يبااا اتمنى انك تعيد هالحجي كل يوم ههههه
دلال : الحين هالكثر سولفنا ماسالنا الوالدة شنو كانت تبي فيني خخخخ يماا ليش ناديتيني؟
ام يعقوب : تعالي داخل اقولج
راحوو دااخل
ام يعقوب : يمااا تدرين ان انا مالي غيرج انتي و اخوانج
دلال خافت : يما شفيييج فيج شي يالغالية؟
ام يعقوب : لا يما بس .. ابيج انتي تعزمين مرت عمج نسيمة و بناتها
دلال : هههههههههههههههههههههههههههههههه الحين كل هذا اخر شي عشان مرت عمي؟ خلاص ولا يهمج يما انا الحين ادق
ام يعقوب : وي حلاااتج بنيتي هههه
:::::
فـــي يــوم الــحــفــلــة
دلال ماكانت لابسة كشخه يعني لان كلهم اهلها
و حتى حنان يعني باختصار
الكل كان لابس عادي ماعــــــــدا عبيرررر
عبالها يعقوب معاهم
دلال : بناااات خنرقص فيني رقص
حنان : ايي ما شاالله السكر عامل عمايله فيج هههه
البنات : ويك ويك ويك هههههههههه
دلال : انا اوريكم قولو عشا والله لاخليكم تنامون على لحم بطنكم
وراحت دلال دار يعقوب تبي تييب المسجل ولا نسيمة بويهها
نسيمة : دلال وين الحمام تكرمين
دلال : كاهو خالتي جدامج
نسيمة : اووكي مشكووورة
مشت نسيمة ولا يم الحمام يكرم القارئ المطبخ
دشت نسيمة المطبخ و شاافت ام يعقوب
طنشت فيها و قالت
نسيمة : ميري منو مسوي السلطة؟
ميري : هذا مدام ماما يعقوب
نسيمة تسوي روحها ماسمعت : ويي تصدقين مشتهية عيش
وام يعقوب ساكتة ماتبي تخرب الحفلة عشانها
ميري : مدام انا يقول حق محبوب سايق يجيب حق انتي خبز ؟
نسيمة بصوت عالي : لا ويي خوفج يروح يطر من الخباز نفس واحد اعرفه
ام يعقوب عصبت : شقصدج يام عبدالله؟
نسيمة: مو قصدي شي الا اذا انتي مشبهة على ريلج يعني
ام يعقوب : ريلي تاج على راسي و راس الكل الحمدلله
نسيمة : لان راسج واطي و ريلج طرااار ماخلا احد ماتسلف منه
ام يعقوب : انا راسي واطي؟@@ و بعدين ريلي شريف ولله الحمد و الزم ماعليه كرامته مامد ايده حق احد
نسيمة : اي مبين الصراحه انا مو بالعتج ولا بالعه ريلج
ام يعقوب : نسيمة ثمني كلامج احسنلج ريلي مالج شغل فييه اشيله بعيوني
نسيمة : واذا ماني مثمنه؟
ام يعقووب : لي اسلوب ثاني معاج
يوو البنات على هالصراخ و ام محمد قاعده و تهدي فيهم
ولا يون الرياييل
بو يعقوب : خير شفيكم شصاير؟
نسيمة : شوف مرتك هاللي ماتستحي تقول عن مادري منو تاج راسي
بو عبدالله : بو يعقوب امسك حرمتك ترى احنا ضيوف عندكم
ام يعقوب : بو يعقوب احلفلك و الصلاة اللي اصليها انها اهي اللي بدت تقط عليي حجي و انا ماقدر اسكت
بو عبدالله : ولوو يام يعقوب المفروض تحترمينها ولا شنو ماكو احترام؟
بو يعقوب : بو عبدالله احترم اخوك اللي اهو ريلها اهو اللي يحاسبها مو انت
بو عبدالله : والله عاد اي واحد يغلط على مرتي يغلط عليي و انا مارضى بالغلط
بومحمد : يا جماعه انتو اخوان لا تسوون اللي تسوونه عيب عليكم كل واحد اكبر من الثاني شفيكم صلو عالنبي
طبعا بو محمد يحاجي طووفة ههه
بو يعقوب : بو عبدالله احترمو المكان اللي انتو فيه و انا اخوك العود عيب هالحجي شقصدك؟يعني انا عادي عندي الغلط؟
بو عبدالله : ماقلت جذي بس مرتك مادري شفيها جنها اهي الكاملة الحين و عاد الله و المكان كلها غرفتين و صاله
ام يعقوب : الله يسامحك يابو عبدالله انا بعينك جذي؟ مشكوور
بو يعقوب : هه و اخيرا طلعت اللي بقلبك و انك مانت قادر تبلعني ليش ان حالتي المادية مو مثل حالتك ؟
بو محمد : لا يابو يعقوب بو عبدالله مايقصد اهي لحظة غضب ياخوك
بو عبدالله : الا اقصد عيل اخوي انا يسكن بهالمكااان؟ هه امشو بنات امشي ام عبدالله مالنا قعده هني
:::
طبعا بو يعقوب و بو عبدالله ماكلمو بعض من ذاك اليوم يمكن بس بو محمد اللي يطمنهم على احوال بعض
حالة بو عبدالله كل مالها و تتدهور خسر فلوس وايدة و الحين مابقاله غير جم فلس مايكفون شي هالايام لكن الحمدلله
بو يعقوب اشتغل بمحل واحد من ربعه القدم شافه بالمسيد و دام ان شغله مضبوط فمعاشه يزيدونه و رقوه اكثر من مرة و الحمدلله الحين عايش بخير و نعمه
:::
في بيت بو عبدالله
ام عبدالله قاعده تسوي الغداا حق بو عبدالله عشان يرد من الدوام
و من بعد ما خسرو ثلاث ارباع فلوسهم تغيرت حيييل صارت احسن
يعني مثل مايقولون انكسر خشمها لكن الله مايطق بعصاا
رن الجرس
ام عبدالله فجت البااب و شافت اثنين لابسين غترة ودشداشة
نسيمة : هلا يمه خير عسى ماشر؟
واحد منهم : بو عبدالله موجود؟
نسيمة : لا والله بس على وصوول
رد بو عبدالله من الدوام صفط السيارة و انصدم .. معقوووووولة @@
مرته و بناته عند باب البيت بعبايتهم يبجون
بو عبدالله : شفيييكم ليش قاعدين هني؟
ام عبدالله بنص بجيها : حسبي الله و نعم الوكيل اطردونا من بيتنا يابو عبدالله اطردوووونا
بو عبدالله :شنوووووووو؟
طلع بو عبدالله متسلف من واحد يعرفه على شرط ان يرهن البيت و لهف هالشخص الفلوس الباجية و البيت
::::
بيت بو محمد
محمد : اووووف محمووودووو
محمود : هااا شتبي ترى ماعندي ولا فلس
محمد : مالت شبي بفلوسك معاشي موجود
محمود : خلص شتبي
محمد : قلت حق امي ابي اتزوج تتوقع منو قالتلي تخطبلي؟
محمود : منوووووووووو؟
محمد : حنان
محمود : ويييييييييييييه الله يعينك على اختها
محمد : ههههههههههههه شفيك مافيها شي ناذيها شورانا
محمود : حرام عليك
محمد : اتغشمر يبا بس احس مو لايق
محمود : اذا من ناحية مو لايق اهو صج مو لايق
محمد : ههههههه بعد شنسوي الوالدة تموت عليها
:::
في غرفه يعقوب
دلال : يعقوو متى تتزوج؟
يعقوب : والله كنت ابي من بنات العايلة بس هونت
حنان : ويي لييش؟
يعقوب : بس مزاج شحاركم انتو .. عوانس هههههه
دلال : لوووووول توني الحمدللله صغييرة
يعقوب : خخخ شنو ترقعين حق نفسج؟الا قولي راح عليج القطار
دلال : وييييي عاد لقيت يهمني
دش عليهم بو يعقوب و باين عليه التعب
بو يعقوب :عيالي شقاعدين يسوون؟
يعقوب : ولا شي بس بنتك غصب بتسوي روحها صغيرة و اهي اكبر من امي
دلال : اصلا انا وردة زماني شحارك انت يا معجون الاسنان
بو يعقوب : ههههههههههههههه بس خلاص كل واحد يحترم الثاني وو تعالو اكلوو
دلال : و اخيرا يباا ضحكت يبا نبي نشوف هالاسنان الحلوة عشان نروح دكتور نوصيه يسوي نفسهم
يعقوب : اي والله لي ضحكتي اكره الضحك بكبره خخخخخخ
بو يعقوب : ايييييه الله كريم يا عيال .. يلا تعالو اكلو
و راح بو يعقوب
دلال : الله ياخذ نسموو و صوتها شسوت بابووي
يعقوب : بعد حريم شنسويلهم ما منهم لا فايدة ولا نفع
دلال : عدااال انتو الحين الي مقصرين كل واحد فارش بطنه و يتحجى بعد
يعقوب : خلصينا امشي لا اقوملج الحين بالمخدة
:::::::
في بيت بو محمد
ام محمد : حموود محموووود زنوووب تعالو اكلووو
ام محمد ماخلصت ماقالت ( لـوو ) الا ذاك الهجووووم من الدري
ام محمد : حشى
