بلاش كلام في السياسة
و ابعدوا يا اخونا عن الرئاسة
خلينا في حالنا علي الشات ..
و بلاش عربي نتكلم احسن لغات
و في المحمول و علي اللاب توب
و في الفيس و المنتديات
هما عايزين يشوفنا كده البهوات
مش عايزينا نقول : عايزين ده يتحاكم و ده ينعدم
و ده مات ..
خلينا عيال سيس .. بنحب التهيس ..
و بلاش نكون اخوان .. او بنسأل الأسيس
صديقنا المفضل ابليس ..
خلي كل كلامنا هاي ... و قشطة يا جماعة و بيس
و لما نحب نمشى نقول باي باي
و سيبك يا مان خليك لطيف
و لما يسألونا عن الحال نقول كول ..
و كل الشغل علي المحمول
لو سألوك عن الاحوال : عن الي مشرفين في طره
قول انا مالي بقولنا و قال .. خالينا كول و بلاش افترى
دول جماعة حلوين يا ناس .. ليه نجرحهم من غير احساس
و الشهداء دول كانوا غلطة .. و مش مهم لازم ننسى
بلاش تتكلم في السياسة
و ابعدوا عن الرئاسة ديه مناصب ليها ناسها
و احنا مش قد الكلام عنها
خلينا احنا علي الفيس في صفحات كلها تهيس
ده بيدور علي صاحبة و ديه بتدور علي عريس
و انا داخل اعمل كام لايك علي صفحة الرئيس
كده عاجبكوا اكيد حالي ..
لما انفض و اقول انا مالي ..
سمعتوا صوتي و لا لسه ...
انتوا قلوبكم مش حاسة
هتفهومني عشان انا مش ناوي
اقول انا مالي و اروح و انسى
بلدنا فوق الراس و عشانها الف حساب
و انا كاتب في الكراس اسامي الاحباب
لو بعد الف عام هيتحسبوا في الميدان
دلوقتى بس هنسكت عشان البلد تهدى
بس تاني هنرجع و نكون اقوى ..
